Kanar orollarida rekord migratsiya
Ispaniyaning Atlantika okeanidagi Kanar orollariga dam olish kunlari Afrikadan kelgan migrantlar oqimi keskin oshdi. Mamlakat rasmiylarining xabar berishicha, oxirgi qirq sakkiz soat ichida orollarga qayiqlarda kelib tushganlar soni ikki ming ikki yugdan ortib ketdi. Noyabr oyi boshidan buyon bu hududga yetib kelganlarning umumiy miqdori toʻqqiz mingdan oshib, bu boradagi barcha oldingi rekordlarni yangiladi.
Ispaniyaning Dengiz qidiruv-qutqaruv xizmati birgina shanba kunining oʻzida oʻn toʻrtta qayiqdan 1488 nafar odamni qutqarib qolganini maʼlum qildi. Bu koʻrsatkich 2020 yil noyabridagi eng katta rekordni ham orqada qoldirdi. Mutaxassislarning taʼkidlashicha, migrantlar asosan Senegal kabi Gʻarbiy Afrika davlatlaridan xavfli va uzoq dengiz yoʻlini bosib oʻtib, kichik hamda odam bilan haddan tashqari toʻlgan qayiqlarda kelishmoqda.
Shanba kuni ushlangan qayiqlarning birida 240 kishi, jumladan 36 nafar bola bor edi. Yevropa Ittifoqining yangi migratsiya va boshpana berish qoidalari joriy yil yozida kuchga kirgan boʻlsa-da, hozircha bu oqimni toʻxtatishga ulgurmayapti. Ispaniya hukumati orollarda migratsiya favqulodda holati eʼlon qilib, muammoni hal qilish choralarini koʻrmoqda.