Компенсация олиш енгиллашди
Электр энергияси ва табиий газ учун компенсация тайинлаш тартибида муҳим енгиллик яратилди. Президентнинг тегишли фармонига мувофиқ, ижтимоий ёрдам тайинлашда даромад мезони оширилди. Эндиликда оиланинг ҳар бир аъзосига тўғри келадиган ўртача ойлик даромад чегараси 1 миллион 72 минг 500 сўмдан 1 миллион 430 минг сўмгача кўтарилди.
Бу қарор қиш мавсумида энергетика харажатларини қоплашда кўпроқ оилаларга давлат кўмагини олиш имконини беради. Фуқаролар компенсация олиш учун аризаларни «Барака» мобил иловаси ёки ягона интерактив давлат хизматлари портали орқали топширишлари мумкин. Шунингдек, Давлат хизматлари марказлари, «Инсон» марказлари ва маҳалладаги ижтимоий ходимларга мурожаат қилиш имконияти ҳам мавжуд.
Ушбу механизм кам таъминланган оилаларни манзилли қўллаб-қувватлашга хизмат қилади.