Saʼdulla Ravshanov jahon kumushini oldi
Dzyudo boʻyicha yoshlar oʻrtasidagi jahon chempionatida Oʻzbekiston terma jamoasi aʼzosi Saʼdulla Ravshanov kumush medalni qoʻlga kiritdi. 81 kilogrammgacha boʻlgan vazn toifasida kurashgan polvonimiz musobaqa davomida yuqori mahorat koʻrsatdi. Saʼdulla Ravshanov finalgacha boʻlgan yoʻlda dunyoning eng kuchli dzyudo maktablari vakillarini magʻlub etdi.
U saralash va yarim final bosqichlarida Yaponiya, Braziliya, Gruziya, Xitoy hamda Fransiya sportchilaridan ustun keldi. Oltin medal uchun kechgan hal qiluvchi bahsda esa rossiyalik Yaroslav Bunakovga imkoniyatni boy berib, ikkinchi oʻrinni egalladi. Ushbu muvaffaqiyat oʻzbek dzyudo maktabining xalqaro maydondagi nufuzi ortib borayotganini yana bir bor isbotladi.
Yosh dzyudochilarning bunday yuqori natijalari ularning kattalar oʻrtasidagi nufuzli musobaqalarga tayyorgarligi sifatli kechayotganidan dalolat beradi. Saʼdulla Ravshanovning muvaffaqiyatidan soʻng Oʻzbekiston terma jamoasi hisobidagi medallar soni 2 taga yetdi. Ayni paytda vakillarimiz 1 ta oltin va 1 ta kumush medal bilan dunyo birinchiligida ishtirokini davom ettirmoqda.