Россия НАТОга минтақамиз бўйича талаб қўйди
Россия Украинадаги урушни тугатиш бўйича Ғарбга қўйган талабларига Марказий Осиёни ҳам киритди. New York Times нашрининг ёзишича, Кремль НАТОдан минтақамиздаги ҳар қандай ҳарбий фаолиятдан воз кечишни талаб қилмоқда. Бу ҳақдаги норасмий ҳужжат Абу-Дабидаги музокаралар вақтида тақдим этилган.
Ҳужжатда Россия Шарқий Европа, Жанубий Кавказ ва Марказий Осиёда альянс базалари бўлмаслигини исташи айтилган. Шунингдек, НАТО ўз қўшинларини 1997 йилги чегараларга қайтариши керак. Бу Польша ва Болтиқбўйи давлатларининг мудофаасини заифлаштириши мумкин.
Россия Украинага қурол етказишни тўхтатишни ҳам қатъий талаб қилмоқда. Бу талаблар 2021 йил декабридаги, яъни уруш бошланишидан олдинги шартларни такрорлайди. Россия минтақани ўз таъсир доирасида сақлаб қолмоқчи.
АҚШ вакиллари эса вазият ўзгарганини ва келажакка қараш кераклигини билдирган. Россия Украинага қарши бир кунда 2000 дан ортиқ дрон учирган бир пайтда бу талаблар янграмоқда. Музокаралар давом этмоқда, бироқ томонлар ҳали келишувдан йироқ.
Россия президенти Владимир Путин айрим бандлар бўйича мослашувчан бўлиши мумкинлигига ишора қилган. Кейинги қадамлар АҚШ ва Европанинг бу шартларга расмий муносабатига боғлиқ бўлади.