Жарима майдонида катта навбатлар
Тошкент шаҳар Йўл ҳаракати хавфсизлиги бошқармасининг маъмурий амалиёт марказида ҳайдовчиларнинг катта навбати юзага келди. Юзлаб одамлар ўз машиналарини жарима майдончасидан олиб чиқиш учун рухсатнома кутишмоқда. Баъзи ҳайдовчилар икки кундан бери навбатда турганини ва тўлов қилиш учун соатлаб вақт сарфлаётганини айтишмоқда.
Бундай тирбандликка 14–15 ноябрь кунлари ўтказилган кенг кўламли рейд тадбирлари сабаб бўлган. Икки кунлик тунги амалиёт давомида жами 751 та транспорт воситаси жарима майдончасига жойлаштирилган. Ҳайдовчилар асосан қарздорлик, ҳужжатсиз ойна қорайтириш ва маст ҳолатда машина бошқариш каби қоидабузарликлар учун тўхтатилган.
Мутасаддилар маъмурий амалиёт марказларига келмасдан, онлайн тарзда ҳам рухсатнома олиш мумкинлигини эслатиб ўтди. Бунинг учун my.gov.
uz портали ёки махсус мобил илова орқали мурожаат қилиш кифоя. Бироқ охирги уч ой ичида атиги етти нафар ҳайдовчи ушбу қулайликдан фойдаланган. Бу эса аҳоли орасида рақамли хизматлар ҳали етарлича оммалашмаганини англатади.