Parkentga yangi elektropoyezd qatnay boshladi
Bugungi «Jamiyat» ruknimizda aholi uchun qulay transport qatnovi haqida soʻz yuritamiz. Davlat rahbari Shavkat Mirziyoyev poytaxtdan Parkent tumaniga yangi elektrlashtirilgan temiryoʻl orqali elektropoyezdda yetib bordi va yangi vokzal stansiyasi faoliyati bilan tanishdi. Umumiy masofasi 57,6 kilometr boʻlgan ushbu yoʻnalishda zamonaviy «EP3D» elektropoyezdi harakatlanmoqda.
Oltita vagondan iborat ushbu tarkib 586 nafar yoʻlovchiga moʻljallangan boʻlib, soatiga 120 kilometrgacha tezlikka erisha oladi. Poyezd Toshkentdan manzilgacha boʻlgan masofani 1 soat 13 daqiqada bosib oʻtadi. Bir tomonlama yoʻl haqi 10 ming soʻm etib belgilangan boʻlib, bu ushbu yoʻnalishdagi oʻrtacha taksi narxidan 2,5 barobar arzon hisoblanadi.
Yangi yoʻnalish kuniga 2 ming nafar, yiliga esa 300 mingga yaqin yoʻlovchi tashish quvvatiga ega. Vagonlar zarur qulayliklar, jumladan klimat-kontrol, USB-razʼyomlar va bepul internet tarmogʻi bilan jihozlangan.