Швеция билан миграция дастури
Ўзбекистон ва Швеция ўзаро келишув асосида янги миграция ва сафарбарлик дастурини ишга туширишга тайёргарлик кўрмоқда. Бу ҳақда Ташқи меҳнат миграцияси агентлиги маълум қилди. Идора раҳбари Муҳсинходжа Абдурахмонов Швециянинг Миграция агентлиги вакиллари билан музокаралар ўтказиб, мамлакат техникумларида швед тилини ўргатиш ҳамда маҳаллий иш берувчилар талаблари асосида кадрлар тайёрлаш масалаларини муҳокама қилди.
Ушбу пилот лойиҳа ўн саккиз ойга мўлжалланган бўлиб, фуқароларни қонуний ва хавфсиз иш билан таъминлашга қаратилган. Шунингдек, юртимизда швед тилини билиш даражасини баҳоловчи махсус имтиҳон марказини очиш режалаштирилмоқда. Томонлар мутахассисларнинг касбий билимларини баҳолаш ва синовдан ўтказиш тизимини яратиш бўйича ҳамкорликни давом эттиради.